IDC e Tecnocom auguran un sector tecnolóxico a proba de crises

Segundo datos extraídos dun recente estudo realizado por IDC España, co patrocinio de Tecnocom, a crise económica actual “vai ter un menor impacto no investimento en tecnoloxías da información das grandes corporacións”.
IDC chegou a esta conclusión logo de entrevistar a directores TI entre os principais clientes de Tecnocom en España. O desenvolvemento do estudo e a análise das entrevista deu lugar, segundo os seus responsables, a tres interesantes informes: As grandes organizacións ante a nova situación económica, O reto da flexibilidade; novos modelos de sourcing e As TI como servizo, o desafío da xestión”.
O primeiro deles, resalta o efecto desigual da crise económica nos distintos sectores de actividade e dentro destes as súas distintas empresas. Asemade, en termos xerais, indica, “as grandes corporacións españolas seguirán a investir en TI non só para reducir os seus custes operativos a curto prazo, senón tamén para, a medio prazo, fomentar a innovación”.
O segundo informe, O reto da flexibilidade; novos modelos de sourcing, identifica unha área de investimento: o sourcing selectivo, que permite que as empresas poidan xestionar, a curto prazo, a complexidade TIC existente do xeito máis eficiente, dentro dun contexto que esixe redución de gastos e axuste dos presupostos TIC operacionais. A medio prazo, o sourcing selectivo tamén permite, segundo afirman, que as empresas “poidan innovar e transformar tecnoloxicamente os procesos de negocio, a competitividade en custes/marxes, a penetración de novos mercados e a colaboración do xeito máis eficiente posible na cadea de valor”.
A área de investimento analizada no terceiro informe do estudo, As TI como servizo, o desafío da xestión, céntrase en arquitecturas orientadas a servizos, que, a curto prazo, están xerando nas empresas un aforro de custes derivado do reemprego de activos tecnolóxicos e que, a medio prazo, permite obter un meirande grao de innovación nas mesmas.