As cidades europeas amosan xa claros sinais de confrontación entre os taxistas e os impulsores de Uber

Seguimos a voltas cunha polémica de longo alcance: a xerada polo rexeitamento de boa parte do sector do transporte tradicional ás iniciativas de transporte alternativo que están a xurdir ao abeiro da Rede co obxectivo de compartir vehículos e gastos e abaratar custes (plataformas como Uber de Google ou tamén a aparentemente menos interesada BlaBlaCar, das que falamos en detalle hai uns días dando conta das esixencias de Fomento para garantir que só ós vehículos con licenza de taxi poidan operar como tales). Pois ben, semella que os internautas que teñan intención de apostar polos transportes alternativos, aplicando a este ámbito boa parte das metodoloxías propias das redes sociais, vano ter máis complicado do que podería parecer.
En contra teñen a taxistas e autobuses facendo presión ante Fomento para que este endureza o control sobre estes novos xeitos de movérmonos pola estrada. Sen ir máis lonxe, o martes houbo paro de taxistas en varias capitais europeas, entre elas Madrid, cousa que algúns medios sinalan que foi aproveitado por Uber para afianzarse e levarase a súa parte.
Os motivos destas mobilizacións foron comúns: amosar perante as respectivas administracións que os ditos sectores non están dispostos a permitir que haxa plataformas que coma as devanditas liguen a condutores e viaxeiros para compartir gastos. O gremio de transportistas quere que se regule o emprego destes servizos dende cada un dos Gobernos europeos.
Como lembraremos, Fomento emitiu esta semana unha nota na que lembra a Lei de Ordenamento dos Transportes Terrestres (LOTT) que esixe que as persoas e empresas que realicen transportes de viaxeiros por conta allea en vehículos de turismo mediante retribución económica deberán recibir autorización da Administración. Dende o Ministerio apuntouse a posibilidade de tomar medidas sobre o asunto, “xa que estes servizos precisan que a Administración comprobe previamente que reúnen unhas condicións de seguridade e calidade axeitadas”. O aviso referiuse principalmente a Uber, posto que nas restantes plataformas (como BlaBlaCar) o Goberno non ve interese económico algún senón unha arela simple de compartir gastos. Porén, o anuncio de Fomento foi de abondo ambiguo como para alporizar a taxistas e empresas de transporte de viaxeiros por estrada, que viron no devandito aviso unha licenza de liberdade de movementos para tódalas plataformas. Para estes colectivos, os usuarios e responsables destes servizos non contan con requisitos necesarios de circulación cos que si que conta un taxista, como licenza, seguro de responsabilidade civil, seguro do vehículo a todo risco, ou ter pasado a ITV cada seis meses.
Esta confrontación xa deixou claros sinais de rexeitamento en cidades como Barcelona, onde Uber xa leva un tempo funcionando ante o malestar dos taxistas, que queren que se suprima ou desapareza. Este problema, por certo, xa fixo que esta semana a Generalitat movese ficha, amosando a súa intención de esixir o cese de actividades de Uber e da aplicación móbil que o sustenta, amais de anunciar a apertura dun procedemento sancionador contra a ferramenta e os condutores que lle tiran partido “prestando servizos irregulares de transporte”.
Cómpre lembrar que Uber xa está afianzado en determinadas cidades e Blablacar aínda se atopa en período de lanzamento (un período de lanzamento avanzado, iso si), e probablemente por este motivo trátase polo de agora dunha aplicación de balde (en Francia de feito xa se comeza a cobrar unha comisión polo servizo de reserva en liña). Os responsables deste servizo teñen manifestado en repetidas ocasións o seu convencemento na legalidade da súa actividade, xa que din que non hai beneficio algún para quen oferta a praza libre. Para eles, está claro que Blablacar ocupa un chanzo diferente aos servizos aos que se refire Fomento co seu anuncio. Trátase só de compartir gastos, din, non de facer negocio algún.
As sancións
Volvendo ao dito comunicado de Fomento e meténdonos xa en cifras concretas, sinalar que nel establécese que as persoas e empresas que presten servizos de transporte “en vehículos de turismo sen autorización” incorrerían nunha infracción moi grave, sancionable con multas de entre 4.001 e 6.000 euros (que poderían chegar aos 18.000 euros por reincidencia), sancións que se aplicarían aínda que o servizo fose prestado a través doutras persoas; a contratación dos servizos de transportistas non autorizados tamén suporía unha infracción grave sancionable con multas de entre 401 e 600 euros; e a simple oferta destes servizos sen autorización tamén sería unha infracción grave sancionable cunha multa de entre 801 e 1.000 euros.
Como dixemos o outro día, queda agora pendente de ver e comprobar se as devanditas advertencias poden afectar ou non á francesa BlaBlaCar, que ten xa unha boa implantación en España, e que conta con máis de 8 millóns de usuarios repartidos en 12 países.
Polo que respecta a Uber, a súa resposta a Fomento e aos paros laborais de taxistas e transportistas de persoas foi semellante ás emitidas os días pasados. É dicir, no seu comunicado o servizo de Google reafirmábase como “non inimigo dos taxistas” e definíndose como “unha aplicación móbil que pon en contacto a usuarios que buscan fórmulas de consumo colaborativo e unha maneira máis económica de desprazarse”. Ao mesmo tempo, os responsables de Uber anunciaron que xa foron que xa foron quen de multiplicar por un número elevado o seu número de clientes, engadindo que o número de inscricións do seu servizo en Londres fora quen de incrementarse nun 850 por cento, se comparamos a cifra actual coa do mesmo día da semana pasada. En palabras de Uber, está claro que a xente quere servizos novos e innovadores, servizos que unan as vantaxes de convocatoria e colaboración das redes actuais coas tendencias que se impoñen de transporte sustentable e eficiente.
Sobre o caso de Barcelona e o rexeitamento dos taxistas locais, Uber escribiu significativamente no seu blog: “A partir do mediodía de hoxe, grupos de taxistas tentarán frear o avance desta gran cidade, pero non vos preocupedes que nos imos ocupar de que Barcelona continúe en movemento. Ofrecémosche un 50% de desconto en todos os teus traxectos durante a folga se divides a túa tarifa con outros usuarios a través da aplicación”.